აშშ-სა და საბჭოთა კავშირს ცივი ომის პერიოდშიც ჰქონდათ კომუნიკაცია, მოგვწონს თუ არა, რუსეთი არის გლობალური ძალა, ჩვენ უნდა გვქონდეს მათთან კომუნიკაცია-მარკო რუბიო
აშშ-ის სახელმწიფო მდივანმა, მარკო რუბიომ რუსეთთან დიპლომატიური ურთიერთობების აღდგენის აუცილებლობაზე ისაუბრა და აღნიშნა, რომ ჯო ბაიდენის ადმინისტრაციის პერიოდში, სამწელიწადნახევრის განმავლობაში მოსკოვთან რეგულარული კონტაქტი არ ყოფილა.
„ცივი ომის პერიოდშიც კი, მის ყველაზე მძიმე დღეებშიც შეერთებულ შტატებსა და საბჭოთა კავშირს ჰქონდათ კომუნიკაცია“, – აღნიშნა რუბიომ.
აშშ-ის სახელმწიფო მდივნის თქმით, მიუხედავად იმისა, რომ ვლადიმირ პუტინის მოქმედებების უმეტესობას არ ეთანხმება, თუ კომუნიკაცია არ ექნებათ, სახელმწიფოებრივი მართვის თვალსაზრისით არარელევანტურია.
„საბოლოოდ, ჩვენ უნდა შევძლოთ დიალოგი ქვეყანასთან, რომელსაც ზოგ შემთხვევაში, მსოფლიოში ყველაზე დიდი ტაქტიკური ბირთვული არსენალი და მეორე თუ არა, ყველაზე დიდი სტრატეგიული ბირთვული არსენალი აქვს. მოგვწონს თუ არა, რუსეთი არის ძალა, გლობალური ძალა. ისინი ჩართულები არიან სირიაში, ახლო აღმოსავლეთში, დასავლეთ ნახევარსფეროშიც კი და, რა თქმა უნდა, ევროპაში. ჩვენ უნდა გვქონდეს მათთან კომუნიკაცია“, – აღნიშნა სახელმწიფო მდივანმა.
როგორც აშშ-ის სახელმწიფო მდივანმა აღნიშნა, პრეზიდენტმა, დონალდ ტრამპმა ნათლად განაცხადა, რომ უკრაინაში ომის დასრულება სურს.
„მას უნდა იცოდეს, სერიოზულად არიან თუ არა რუსები განწყობილი ომის დასრულების საკითხთან დაკავშირებით. ერთადერთი გზა არის მათი გამოცდა და მათთვის კითხვა – სერიოზულად ხართ განწყობილი ომის დასასრულებლად? თუ ასეა, რა არის თქვენი მოთხოვნები? განსხვავდება თუ არა თქვენი საჯარო და პირადი მოთხოვნები? უნდა გვქონდეს რაღაც პროცესი, რომლის მეშვეობითაც ამ საუბარში ჩავერთვებით. შესაძლოა, აღმოჩნდეს, რომ მათ არ სურთ ომის დასრულება. არ ვიცი. გავიგებთ, მაგრამ უნდა გვქონდეს პროცესი ამის დასადგენად“, – განაცხადა რუბიომ.
რუბიოს განმარტებით, მოსკოვში აშშ-ის საელჩო ძლივს ფუნქციონირებს, რადგან მას საბანკო სისტემაზე წვდომა შეზღუდული აქვს.
„ეს უნდა გამოსწორდეს“, – აღნიშნა რუბიომ.
