“ამერიკული “აბრამსის” ტანკები უკრაინაში ვერ იბრძვიან -რუსებმა მათ “კონსერვის ცარიელი ქილები” დაარქვეს” -The Daily Telegraph
ბრიტანული “დეილი ტელეგრაფი” (The Daily Telegraph) ბეჭდავს სტატიას სათაურით „ამერიკული „აბრამსის“ ტანკები უკრაინაში ვერ იბრძვიან. რუსებმა მათ „კონსერვის ცარიელი ქილები“ დაარქვეს“ (ავტორი – ჯორჯ სტილისი).
გთავაზობთ პუბლიკაციას მცირე შემოკლებით:
უკრაინელი სამხედროები ჩივიან, რომ ამერიკულ ტანკებს „აბრამსებს“ (Abrams M1) სუსტი ჯავშანი აქვთ, რაც დრონების წინაშე მათ დაუცველ ხდის. მძიმეწონიანი ჯავშნიანი მანქანები რუსებისათვის მსუბუქ და იოლ სამიზნეს წარმოადგენს.
„აბრამსები“ უკრაინის ველებზე მარცხს მარცხზე განიცდიან. რუსებმა ისინი „კონსერვის ცარიელ ქილებად“ შერაცხეს.
გასულ წელს ამერიკამ უკრაინას 31 „აბრამსი“ გადასცა. ბევრი თვლიდა, რომ ტანკების გადაცემა კიევისათვის მოსკოვთან ბრძოლაში თამაშის წესებს შეცვლიდა.
უკრაინა ყოველთვის ამბობდა, რომ მისი ძველი საბჭოური ტანკები ტალახში ეფლობიან, მიზანში ვერ ისვრიან და სწრაფად გამოდიან მწყობრიდან. მაგრამ, როგორც ჩანს, არც ამერიკული თანამედროვე ტანკები არიან საბჭოურზე უკეთესები.
CNN-თან ინტერვიუში უკრაინელი ტანკისტები ამბობენ, Abrams M1-ები მაინცდამაინც დიდი საიმედოობით არ გამოირჩევიან: „ჯავშანი არასაკმარისად მტკიცეა, – თქვა ეკიპაჟის ერთ-ერთმა წევრმა, – ჭურვის მოხვედრისას ეკიპაჟი დაცული არ არის, განსაკუთრებით, როცა ზემოდან დრონი გვიტევს. როცა ბრძოლის ველზე გავდივართ, დრონები ცდილობენ დაგვაზიანონ და აგვაფეთქონ“.
ჩვეულებრივად, თანამედროვე ამერიკული ტანკები „ურანის შემცველი საიდუმლო ჯავშნით“ არის აღჭურვილი, მაგრამ ამერიკელებმა უკრაინას ისეთი მოდიფიცირებლი “აბრამსები” მისცეს, რომლებსაც „ჩობჰემის“ ჯავშანი აქვს – ძველი 1960-იანი წლების გამოგონება – კერამიკისა და ფოლადის ნარევისაგან დამზადებული კომპოზიტით. პენტაგონმა ეს, ალბათ, რუსეთის შიშით გააკეთა, რომ ურანიანი ტანკები კრემლის ხელში არ ჩავარდნილიყო.
როგორც უკრაინელი ეკიპაჟები ამბობენ, „აბრამსის“ მთავარი პრობლემა ისაა, რომ მათი გამოყენება ბრძოლის ველზე მხოლოდ არტილერიისა და ავიაციის თანხლებით შეიძლება, მაგრამ არც პირველი და არ მეორე უკრაინის არმიას არ ჰყოფნის.
რუსეთი კი, თავის მხრივ, „აბრამსების წინააღმდეგ აქტიურად იყენებს უპილოტო საფრენ აპარატებს, რომლისგანაც ამერიკული ტანკები მთელი ძალით ცდილობენ თავდაცვას.
რუსეთის დრონებს შეუძლიათ სწრაფად აღმოაჩინონ “აბრამსები” და მათზე ნადირობა დაიწყონ. ტანკის ერთ-ერთი მძღოლი-მექანიკოსი CNN-ის კორესპონდენტს უყვება, თუ როგორ დააზიანა დრონმა მისი „აბრამსი“, იგი მძიმედ დაიჭრა და სიცოცხლის გადასარჩენად კიდურების ამპუტირება დაჭირდა.
უკრაინის არმიის სარდლობამ გადაწყვიტა „აბრამსები” ფრონტის ხაზიდან გაეყვანა და მათი განადგურება თავიდან აეცილებინა. ახლახან ერთ-ერთმა ამერიკელმა სამხედრო მაღალჩინოსანმა “დეილი ტელეგრაფს” ანონიმურად შეატყობინა, რომ ამჟამად ბრძოლის ველზე ამერიკული ტანკის შეუმჩნეველი გადაადგილება შეუძლებელია, „აბრამსები“ თავიდანვე ექცევიან დრონების ყურადღების ქვეშ.
კრემლმა სწრაფი რეაგირება მოახდინა “აბრამსების” ნაკლოვანებაზე და მათ უუნარობაზე – დაეცვათ საკუთარი რეპუტაცია მსოფლიოში საუკეთესო ტანკთან დაკავშირებით. თუ გავითვალისწინებთ იმას, რომ ერთი “აბრამსი”10 მილიონი დოლარი ღირს და მას თითქოსდა სამი კილომეტრის სიშორიდან რუსული ტანკის განადგურება შეუძლია.
სხვათა შორის, ერთ-ერთი დაზიანებული „აბრამსი“ რუსებმა ფრონტის ხაზიდან გაათრიეს და მოსკოვში წაიღეს საჩვენებლად – მტერთან ბრძოლაში მიღებული ტროფეის სახით და მას „კონსერვის ცარიელი ქილა“ უწოდეს.
როგორც უკრაინის თავდაცვის სამინისტროს წარმომადგენელმა განაცხადა, ამჟამად უკრაინა ტესტირებას უკეთებს და აუმჯობესებს იმ უცხოურ ტექნიკას, რომელიც თავდაპირველად ომისათვის არ იყო მომზადებული.
“ჩვენ ვთხოვთ ყველა სახელმწიფოს, რომ მოგვაწოდონ ყველა დონის სარემონტო და სარეზერვო-სათადარიგო დეტალები. ჩვენ მათ შესაბამისი სახით გამოვიყენებთ”.
