“ამ ხელისუფლების პირობებში უზარმაზარი ძალისხმევა ჩაიდო, რომ სწორედ ადამიანის უფლებების დაცვის მიმართულება ყოფილიყო რაც შეიძლება მეტად გამართული”
ადამიანის უფლებათა დაცვის კომიტეტის თავმჯდომარე მიხეილ სარჯველაძე ევროკავშირის ანგარიშს გამოეხმაურა.
„ძალიან კარგი ამბავია, ფასდება საქართველოს ადამიანის უფლებათა დაცვის სისტემა როგორც გამართული. ერთმნიშვნელოვნად დადებითი შეფასება აქვს. ძალიან მნიშვნელოვანია, რომ ეს არის უზარმაზარი შრომის შედეგი, რომელიც გაიწია ბოლო წლების განმავლობაში. ჩვენ გვახსოვს ადამიანის უფლებების დაცვის მიმართულება ყველაზე მეტად ჩავარდნილი სფერო იყო წინა ხელისუფლების და ამ ხელისუფლების პირობებში უზარმაზარი ძალისხმევა ჩაიდო, რომ სწორედ ადამიანის უფლებების დაცვის მიმართულება ყოფილიყო რაც შეიძლება მეტად პრომოუტირებული, გაძლიერებული, სისტემა გამართული და რეალურად ჩვენ ეს შევძელით“, – განაცხადა სარჯველაძემ.
ევროკავშირმა მსოფლიოში ადამიანის უფლებებისა და დემოკრატიის მდგომარეობის შესახებ 2022 წლის ყოველწლიური ანგარიში გამოაქვეყნა, რომლის თანახმადაც, ზოგადად, საქართველოში ადამიანის უფლებათა მყარი სისტემა არსებობს, რომელიც საერთაშორისო და ევროპულ სტანდარტებთან შესაბამის კანონებსა და პოლიტიკას მოიცავს, თუმცა, მათი აღსრულება რამდენიმე მიმართულებით უნდა გაძლიერდეს.
